الموت على الأسفلت :للشاعر عبد الرحمن الابنودى

من الزوايا والأركان
خرج الطوفان:
ألوفات شبان.
إصعد يادخان
إبعد ياشيطان
إجبن ياجبان
رجع الاسم ورجع العنوان.
يغلى البركان
ويفور
ويدور
إتهد السور .. طلع الإنسان.
الصدر العالى عليه الوشم:
خريطة الدم .. فلسطين ياأحلا الأوطان.
مين قال بعنا ..؟
مين قال ضعنا؟
يا تمانية واربعين كدابه وكدابه ياسبعه وتسعين.
التار له نار طى الكتمان
واليوم يا خليل
يا جليل
يا بيت لحم ..الإعلان
يا..صوت الطفل اللى بيحررنى ف بلدى
بارك ربى فيك.....ياولدى
يا..نهر النار الفايره اوعى تبطل جريان
دراعات الوحش الغاضب..أصوات الكروان
راجح
فالح
مازن
مروان
وأخدنا بتارك يا غسان
يا كمال ناصر
دمك حاصر
أعداءك..مش بس فى لبنان
يا ... ماجد يابو شرار جينا
دمك فينا
لسة سامعينك تنيادينا
ما عادتش الدمعة مكتومه
صبحت صرخة
صبحت صرخةروح محمومه
تصفع روما
ع الكتف نشيلوا سرير الفندق ونشيلك
مواويل الثوره مواويلك
تحت قميصك غنوة شهدا
من كل مخيم...
زاحفه يا ماجد تحت الثوره تغنى لك
عطر الآنبياف مناديلك
أولادك يابو شرار بالطوب
عدلوا المقلوب
شطبوا كل القدر المكتوب
فتحوا بوابة الفجر
وواجهوا الغدر
وصاحوا:يا فلسطين
يسقط كل الكدب العربى
يسقط كل الاخوه الخاينين
نرسم بالدم خريطه للآوطان
إتفلت الجان
والمسجون قام ياكْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْْل السجان
دارت دارت
لعبتهم بارت..
قوتهم خارت.. وانهارت
والدايره على الباغى دارت
دارت .. دارت
يادنان الكبت ..الظلم .. القهر .. على الطرقات .. فارت.
ومخيم بات .. وصبح ميدان
صبح ميدان والدنيا
الدنيا اتحطت واتشالت

الله على الكلام
الف شكر ليكى

» يا أمة قومى بقى :للشاعر عبد الرحمن الابنودى
» زيــَـــــــــارَة ٌ. . . !عبد الرحمن يوسف
» عَـلــــى الـمَـكـْـشـُــــوفِ ! ! !عبد الرحمن يوسف
» اجمل الصور صوره البسمله بسم الله الرحمن الرحيم